Ban alaba Señor

E siguiente videoklip ta di e kantante Danny Berios. E kantika yama “Alaba a Dios”
Si, rumannan. Manera a kantika ta bisa nos mester alaba Dios semper bai, ora bo ta tristu, kontentu, alegre, traishoná, desepshoná, tur ora bai alaba Señor, nos Dios!

Alabá Señor, tur nashon
tur pueblo kanta su gloria!

Su amor i bondat pa nos ta grandi
i fieldat di Señor ta etèrno.

Alabá sea Señor!

Salmo 117

Oktavario di Orashon pa unidat di Iglesia: 18 – 25 yanüari 2008

Apertura lo ta dia 18 di yanüari 2008 na Ebenezer Church na Steenrijk i klousura lo ta dia 25 di yanüari na Basílika Santa Ana na Otrabanda pa 7’or di anochi
Esaki ta ocho dia di orashon ku tur esnan ku ta kere den Kristu Hesus rònt mundu, p'esei: Katólikonan, Òrtodòksnan, Protestantnan, Anglikanonan i otro grupo, ku a separá for di otro, ta pidi Tata Selestial hasi, ku tur esnan ku ta kere den Hesus, por ta un, meskos ku Tata, Hesus i Spiritu Santu ta Un. Laga nos resa ku fervor durante e dianan aki pa tur divishon disparsé.
Tekstonan bíbliko, meditashon i orashon pa e Siman di Orashon

Promé dia 18-1-2008 Resa kontinuamente
Resa kontinuamente (1 Tes 5,17)

Di dos dia 19-1-2008 Resa semper, lo bo no tin mas konfiansa ku den Dios Yama Dios danki bou di tur sirkunstansia (1 Tes 5,18)

Di tres dia 20-1-2008 Resa kontinuamente pa kombershon di kurasonnan
Kurashá esnan desanimá i sostené esnan debil (1 Tes 5,14)

Di kuater dia 21-1-2008 Resa kontinuamente pa hustisia
Mira pa ningun hende paga malu ku malu; al kontrario, buska pa hasi loke ta bon pa e otro rumannan i pa tur hende (1 Tes 5,15)

Di sinku dia 22-1-2008 Resa kontinuamente ku un kurason ku pasenshi Tene pasenshi ku tur hende (1 Tes 5,14)

Di seis dia 23-1-2008 Resa semper pa optené e grasia pa kolaborá ku Dios
Sea semper kontentu. Resa kontinuamente (1 Tes 5,16)

Di shete dia 24-1-2008 Resa pasobra nos tin nesesidat
Sostené esnan debil (1 Tes 5,14)

Di ocho dia 25-1-2008 Resa semper pa nos ta unu
Biba na pas ku otro (1 Tes 5,13b)

Amor

Amor semper ta perseverá, semper ta kere, semper ta spera i keda soporta. Amor ta dura pa semper (1 Kor 13: 7-8)

For di kuminsamentu ta tin amor. Dios a duna Adam un pareha pa nan multiplika i yena mundu. Despues ela duna nos su úniko Yu. I e Yu a duna su bida pa nos pa mustra nos su amor sinsero.

Amor tin biaha ta duru pero ku perseverensha e ta pasa dor di tur problema.

Amor tin biaha no ta korespondibel. Si esei no ta p’abo, lag’e bai p’esun korespondibel. Un dia lo yega ku amor lo bati na bo porta. Warda ku pasenshi. I si amor akaso a hasi bo daño, trata pa e herida sera, proponiendo bo mes pa lubida loke a pasa. Amor no ta solamente hasi njokonjoko pero un kariño, un sunchi, un bon nochi òf bon trato i mantene kastidat te ku matrimonio.

Amor no ta bo pareha so, pero.... pa bo mama, ruman muhe, ruman homber, tio, tanta, bisiña. Pues stima tur hende rondo di bo. ESEI TA AMOR

Dios me dijo que No.

E video klip aki ta di Samual Hernandez- " Dios me dijo que no"
Dios ke pa nos hasi su bolundat. Mi ta enkurasha bo pone bo konfiansa den Señor tur ora bai!

Maske mi pasa den e klof di mas skur, mi n' tin miedu di nada: Abo tei ku bo garoti i baston, ta nan ta mi amparo (Salmo 23:4)

Habri bo mes pa Señor

Señor ta kompasivo i tierno, yen di pasenshi i bondat amoroso (Salmo 103:8)

Mi rumannan ojo!

Kuantu mas bo ta bisa Señor warda mi òf kuantu mas Señor tin di warda riba bo? Señor ta bati na bo porta di kurason pa bo habri p’E. E ora a yega pa bo bisa Señor atami aki, bo bolundat sea hasí.

No laga bo tambe keda mane e palu ku no ta duna fruta i keda ku un kurason bashi òf un kurason yen di odio,vengansa.

Mi rumannan no preokupa pa dia di mañan òf ku esun den bo banda. Habri bo mes i laga Señor drenta pasó si bo ta bin misa bashi, bo ta sali bashi. I despeus ku bo bai otro Iglesia bo ta bisa nunka mi no a haña e palabra aki na e otro misa òf mi no a sintimi yena mane aworaki, sin sa ku e kos ta na abo mes. Ta pesei si bo ta sintibo bashi òf nunka ahinda bo no a bisa Señor bin biba den bo, mi ke enkurasha bo pa halsa bo man i alaba nos bon Dios.
Pasó kaminda tin un, dos òf mas Señor lo ta presente.

Skirbí dor di Dudley Legito

I will Follow Him

E siguiente ta un kantika "I will Follow Him" di e pelikula Sister's Act komo aktris prinsipal Whitney Houston. There is no mountain high that can keep me away from His love! Yes, sir. I definetely love him.

Unas pocas palabras de Dios

Hijo mío que estás en la tierra preocupado, solitario y tentado, conozco bien tu nombre y lo pronuncio santificándolo porque te amo. Nunca estarás solo, yo vivo en ti, y juntos estableceremos el reino de la vida que te daré en herencia.

Me agrada que hagas mi voluntad porque en efecto quiero tu felicidad. Tendrás el pan de cada dia, no te preocupes. Pero te pido que lo compartas con tus hermanos.

Debes saber que perdono todos tus pecados pero te pido que tu tambien perdones a los que te ofenden, y para no caer en la tentación toma con todas tus fuerzas mi mano y te libraré del mal.

Tu Padre
Dios

Pensamentu

No balora bo mes dor di kompara bo mes ku otro hende pasobra tur hende ta uniko i spesial

No fija bo metanan riba lokual ku otro hende ke pa bo of ku lokual otro hende ta haña importante. Unikamente ABO sa kiko ta bon pa bo

No tuma bo deseonan komo algu ku no ta importante, mara bo mes na nan i no laga na skapa for di bo mannan

No laga bo bida skapa for di bo man pa motibu ku bo ta biba den pasado òf den futuro. Si bo biba bo bida dia pa dia, lo bo biba tur e dianan di bo bida.

No pèrdè speransa , nada no ta kaba te na e momentu ku abo disidi di stòp

No sinti miedu si bo tin ku aksepta ku bo no ta perfekto, pasobra é hende perfekto no ta eksisti

No sinti miedu pa tuma riesgu den bida, pasobra dor di tuma riesgu nos ta haña sa kuantu kurashi nos tin.

No sera porta pa risibi amor dor di bisa ku bo no ta hañ’e nunka. E manera di mas lihé pa haña amor ta dor di brinda, e manera mas fasil pa pèrdè amor to si bo tené será i e manera di mas efektivo pa konserva amor ta si bo dun’e ala i lag’e bula liber.

No hasi bo bida un kareda sino despues lo bo lubida unda i kiko bo ta hasi. I primordialmente lo bo lubida na unda bo ta bai. Pasobra durante di e henter e kareda bo a konsentra ariba bo kondishon fisiko.

No lubida nunka e nesesidat emoshonal mas grandi di un hende ta pa e sinti su mes apresiá i stimá

No sinti bèrguensa di siña algu. Den e biahe di bida e lo ta un karga sin peso pero di hopi balor.

No usa tempu i palabra por nada i kita nan balor. Ningun di dos bo por gana bèk.

No kosidera bida un kareda. sino un biaha largu i kostoso. Hasi bon uso di dje i disfrut’e

Ayera ta historia, manjan ta un misterio i awe ta un regalo. Pesei nos ta yam’e presente
(Yesterday is a history, Tomorrow i s a mystery and today is a gift. That is why we call it THE PRESENT)

Historia di e stul

E yu muhé di un bon hòmber, Hosé, a bin pidi un saserdote pa bin bishita su tata ku ta hopi malu.

Ora e saserdote a yega na e kamber di Hosé, ela hañ’e ku su kabes abou drumí riba un par di kusinchi. Tabata tin un stul banda di su kama i e saserdote a pensa ku e hòmber tabata sa ku e tabata bin bishit’e.
"Mi ta supone ku bo tabata wardando mi òf nò” e saserdota a bisa Hosé.
“Nò, mi no tabata sa ku bo ta bai bini”: Hoséa kontesta.
“MMMM.... e ora ei mi a ekiboka. Ora mi a mira e stul banda di bo kama, mi a supone ku bo tabata sa ku mi ta bai bin bishita bo”
“Ang sii..., e stul” e hòmber malu a bisa pensativo “Por fabor bo por sera e porta pa mi?”
E saserdota sera e porta i ela bin sinta banda di Hosé.
“Bo sa pastor, mi a pasa henter mi bida ta puntra mi mes kon mi tin ku resa. Ora mi tabata den misa semper mi tabata skucha ku tin ku resa i kiko su benefisionan ta. Tur e siñansa di orashonnan tabata drenta un orea i sali for di e otro orea. Pa e motibu akí pa hopi tempu mi a bandona orashon por kompletu. Esaki a dura te ku kuater aña pasá. Kòmbersando un dia ku mi mihó amigu ela bisami: Hosé, hasi orashon ta fasil. E ta bai tokante di tin un kombersashon ku Hesus manera nos tin awokí. Ademas mi ta sugeri bo hasi manera ami. Sinta riba un stul i pone un otro stul bo dilanti. Despues ku hopi fe, wak Hesus sintá bo dilanti riba e stul. Esaki no ta algu loko. Pasó Hesus a bisa ku semper elo ta ku nos. Mi a hasi e un bes i mi a gust’e asina tantu ku awó mi ta hasi e dos ora diario. Pero mi tin ku wak bon pa mi yu muhé no wak mi, sinò e ta hibami un luga di hende loko.”
E saserdote a emoshona hopi ora ela tende e loke Hosé a bisa. Ela bisa Hosé ku ta hopi bon e loke e ta hasiendo i no stòp di hasi e. Hosé a konfesa, a risibi e santu oleo i Eukaristia.

Dos dia despues e yu muhé di Hosé a yama e saserdote pa bisa ku su tata a fayese.
E saserdote a puntra “Ela fayese en pas?”
“Si, pastor. Ora mi tabata pa sali banda di 2’or di atardi, ela yamami, despues ela bisami kuantu e ta stimami i ela dunami un sunchi. Ora mi a yega kas un ora despues, mi a hañ’e morto. Pero tin algu ku a strañami. Mi no sa dikon, pero bo por a mira ku mi tata a hasi un esfuerso pa e yega na stul ku tabata banda di su kama. Mi a hañ’ ku su kabes drumí riba e stul. Kiko esaki por nifika?”
E saserdote a emoshona su mes masha hopi mes despues di tende esaki.
Despues e di “Mare nos tur por muri na e manera aki.”

Mi rumannan, orashon ta simpelmente un kombersashon entre abo ku Dios. No tene miedu. Papia kunE. Sigur elo skucha bo!

Mi Tata ta stimami

Awe mi ta pone un videoklip di e kantika "Mi Padre me ama" di Juan Luis Guerra. Si! Nos bon Tata ku ta na shelu ta stima nos. Anto e ta stima nos asina tantu ku Hesu Kristu, su uniko yu, a muri na krus pa salba nos di pika. Semper konfia den dje i dun'e danki semper bai.

Motivashon pa Sigi Dilanti

Kuantu di nos no a yega di pasa den situashonnan hopi komplika òf difisil, kaminda nos ke ku solamente den un será di wowo deskubri ku ta un soño teribel e ta. Pero e bèrdat ta ku nos tin ku realisa ku Señor ta presente i hasta den e momentunan mas difisil. Su mannan habrí ta laga nos rekòrda kuantu E ta stima nos.

Laga nos pidi ku fe pa nos por haña bendishonnan di Dios. Pero si boluntad di nos Tata ta otro, laga nos semper ta kontentu i gradisi Señor. Pasó solamente E sa kiko ta bon pa nos.

Ser kristiano ta nifika imita nos salbador Hesu Kristu. I E semper tabata obedesido i ta asepta boluntat di Dios Tata. Pues laga nos sigi bai dilanti. Laga nos kana semper huntu ku Señor Hesus i sin wak e tamaño di e problema, Kristu semper lo ta mas grandi kuné.

Enkuentro ku Dios

Tin un historia masha bunita mes ku mi ke komparti. Un biaha ta tin un astronauta ku den su paseo dor di espasio e no ta tin e suerte di topa ku Dios. E ora ei un saserdote di Mosku a bisa: “ Ta hopi natural. Si bo no a top’E riba tera, nunka lo bo hañ’E den shelu.”

Mi amigunan, unda nos ta buska Dios? Esaki ta un pregunta hopi grandi ku nos tin ku hasi nos mes ora nos sinti nos só, tristu of abandoná. I hopi biaha nos ta okupá ku nos asuntunan di nos bida druk i di strès, pero nos no ta saka un poko di nos tempu pa ta den trankilidat pa asina por kòmbersa kunÉ.

Portá nos ta buska Dios “den shelu” i nos no ta realisa ku Dios ta den nos kurason. Si bo ta desea di topa ku Hesus, duna e promé paso, i duna bo mes un minut di sosiegu pa kòmbersa kunÉ.

Mi ta invita bo pa awe bo topa ku Dios kara a kara. E Dios ei ku ta stima bo i ku semper ta huntu ku bo. Pero ku hopi biaha nos no ta mira ora nos busk’E den e luganan òf momentunan ekiboká kaminda E tei tòg, pero nos nò.

Hesus ta Inmortal

Awe mi ta ke pone un video di un kantika hopi bon. E kantika yama “El Inmortal” di Manny Montes. Djis untiki biografia di dje. Manny Montes ta un kantante di reggeaton di e isla Puerto Rico. E kantika “El Inmortal” ta un kantika basta bieu kaba pero e tin un mensahe ku kada bes di nobo ora bo skuch’e bo ta keda impaktá. Hesus ta Inmortal i ela muri na krus pa tur HENDE SU PIKANAN. Inkluyendo AMI I ABO! Esaki no ta un berdadero prueba di e amor di Dios? Disfruta di e letranan bunita pero ku ta papia bèrdat di Manny Montes.

Orashon

Komo ku awe, dia 1 di januri 2008, ta e promé dia di aña, mi ta ke probecha di hasi Dios Tata un orashon pa nos tur pa asina e aña akí ta un aña den kua nos ta aserka Dios mas.

Tata eterno i selestial. Mi ta alabaBo i yamaBo danki pa kada un di e milagernan ku bo ta hasi den nos bida. Danki Tata pa nos salud, famia, trabou i e oportunidat di lanta nos i hiba nos mas serka di Bo. Danki Dios todopoderoso pa kuminsa ku un aña nobo. Mi ta pidi Bo pa e aña akí sea un aña kaminda nos ta tuma di bo man i nos por ta manera Bo. Danki Señor pasó semper bo ta den nos presensia. Oh Tata, laga nada aleha nos for di bo amor inkondishonal i laga nos kompronde ku nada nos no por hasi sin bo . Laga nos kompronde tambe ku solamente kanando huntu ku Bo nos lo ta riba e kaminda korekto. Drama bo bendishon riba tur hende ku nos ta stima i ku nos no ta stima. Yena nos ku bo Spiritu Santu, Senjor.
Tur esaki nos ta pidi Bo Señor den e nòmber poderoso di bo yu Hesus i pa ku e gloria ta pa bo den tur eternidat.
AMEN

Laga e aña aki sea un aña bendishona pa bosonan tur!