Videoklip Las Avispas

Esaki ta un videoklip masha bunita di Juan Luis Guerra ku e titulo di Las Avispas. Skuch'e!

Reflekshon riba Kuaresma

Kuaresma ta un tempu di reflekshon, orashon i ajuno.
No mira e kuarenta dianan aki komo dianan ku bo ta juna pasobra e ta algu obligatorio òf paso otronan ta hasi e. Pero tum’e komo algu serio i buska e pakiko i sinti bo mes liber dor ku bo sa e bèrdat.
Si bo ta juna, laba bo kara i drecha bo kabei. Pone un sonrisa bunita riba bo kara i laga esaki ta un sekreto entre abo ku Dios i bo tata ku ta mira tur kos , lo rekompensabo. Meskos ku orashon, no hasi mane e hipokritanan pero retira bo mes den bo kamber òf un luga trankil i resa na bo tata i e na su turno lo rekompensabo .

Alabes mira e kaminda di krus ku Hesus a pasa i pone bo mes na luga di Hesus. Sigur lo bo bisami ku lo bo no por karga e krus pisa ei. Pero Hesus si a hasi E sabiendo ku E ta Yu di Dios Altisimo. E la karg’É pa nos pikanan. E kaminda di krus ta un momentu pa nos para un ratu ketu anto reflekshona riba tur loke Kristu a hasi pa nos por haña salbashon. Si bo medita riba su kaminda di krus, bo ta bin pensa ku enbèrdat e hòmber aki a entrega su bida kompletamente na nos. E no a import’É kuantu kos e mester a pasa aden. Loke ta mas bunita ta ku tur esaki Ela hasi E pasobra e ta stima nos asina tantu ku E no ke pa nos bai pèrdi..
Ora un hende deskubri su fe i deskubri Kristu, e no por biba plenamente mas den komunion ku otro miembronan di Iglesia si e no prepara su mes i sigi siña tokante su fe . Ku tur rason nos mester bisa esaki di tur kreyente i na un manera special di tur mienbro di gruponan apostoliko . Un hende no por bisa nunka ku e ta prepará kaba pa selebra pasku di Señor. Pesei un kristian semper por prepara su mes mas i e por alkansa un komprenshon mas grandi di Kristu su misterio di salbashon.
Esaki ta e pakiko nos ta selebra kuaresma, seis siman largu pa tende palabra di Dios ku hopi atenshon i praktika nos bida kristian ku mas fervor i amor.

I kòrda riba e bunita sakramentu di rekonsiliashon (konfeshon).
Konfeshon ta hasi nos liber di nos pikanan. E ta alivia nos dolonan Tambe si bo ke pa Dios pordona bo pikanan, bo tambe mester ta kapas na pordona otro.
Nos bida moderno ta yen di tentashon (plaser ,sensualidat, egoismo,plaka,droga i alkohòl)
Si nos no paga tinu nos por kai den pika hopi fasil. Pesei si nos ke drenta den komunion profundo ku pashon ,morto i resurekshon di Hesus, nos mester renoba profundamente nos bida kristian pa medio di un preparashon bèrdadero, outentiko i sinsero .
Tur e tentashonnan aki nos por vense ku orashon pasó orashon tin poder nan maravioso. Spesialmente den famianan.un famia ku ta resa uní, ta keda uní
Djarason di shinishi ta un dia hopi spesial den iglesia Katoliko. E dia aki ta duna nos e oportunidat pa nos bai reflekshona riba nos bida i riba nos relashon ku Dios. E saserdote ta marka un krus riba bo frenta anto bisa “ta di shinishi ba bini i ta shinishi bo ta bolbe bira” òf “komberti i kere den evangelio”

Rumanan, ku e pas di nos Señor Hesus keda ku boso i un bon i santu kuaresma.

skirbi dor di Dudley Legito

Mi a peka Señor, pordoná mi- Invitashon SSM

Nos tur riba e mundu aki ta un pekador,pues ban demostrá Kristu Hesus ku nos ta dispuesto pa laga tur e mal aktonan aki un banda, spesialmente awor ku kuaresma ta bai kuminsá, ban sigui nos Señor Hesu Kristu pa e guia nos semper den e bon kaminda i pidié pordon pa tur lokual ku nos a hasi. Ban hasi esaki asistiendo na un Santu sakrifisio di misa ku nos hóbennan di Fatima ta organisá pa un i tur pero spesialmente pa nos hóbennan kual ta nos futuro di mañan.


Fecha: 10 di febrüari
Lugá : misa di Suffisant
Ora : 9or di mainta


Un biaha mas nos di hóbennan di Fatima ta hasi un yamada na tur nos hóbennan di nos komunidat pa asistí na un Santu sakrifisio di misa. Wak pa boso no pèrd’é.

Difernsha prinsipal entre Dios i diabel

Hopi di nos ta ignora un bèrdat ku ta hopi importante pa sa. E diferensha prinsipal entre Dios i diabel no ta sintá den e poder ku nan tin. Promé ku mi kontesta e pregunta grandi kiko anto si ta e diferensha, laga mi mustra algun kos.
Ta asina ku tur dos tin hopi poder. Tur dos por laga hopi kos pasa. Hopi biaha bo ta tende hende bisa ku Dios ta todopoderoso i esei ta bèrdat. Pero e mester wordu pone den e konteksto korekto. Si nò, e ta hasi ku un hende no ta kompronde kiko ta ser todopoderoso. Si bo wak bon hinter e historia di beibel i tur e kosnan ku nan ta relata den beibel un kos mester resalta. Dios ta stima su kreashon i no ta desvia di su promesanan. Si bo wak den historia di e profetanan, bo por mira ku por ehèmpel varios profeta a profetisa kiko lo pasa na momentu ku e Salbador (Hesus Kristu) bini. Si bo wak bon TUR e profesia nan a kumpli te asta esnan ku pa hende ta imposibel. Pa duna un ehèmpel un birgen na estado no ta algu ku ta kuadra ku lokual pa nos ta posibel. Ta esaki ta mustra e loke mester wordu kompronde bou di todopoderos. O sea hasi kosnan ku pa hende ta imposibel: fisikamente of teorotikamente. Ku e detaye ku tur loke e profetanan di Dios a profetisa a wordu kumpli, ta mustra ku Dios ta kumpli ku TUR loke e priminti. Sin kita nèt, nèt nada. Ta nèt esaki ta e gran diferensha ku e enemigu ku pa logra su metanan ta usa engaño, trose e bèrdat, mitar bèrdat pa logra su meta. E bèrdat ta ku Dios todopoderoso NO POR ni lo NO gana. Un versikulo di beibel ta bisa: “Dios, ku no ta gaña, a priminti e bida eterna ei promé ku kuminsamentu di tempu.” (Tito 1:2b). Ta hopi importante pa tur hende sa e bèrdat aki entre Dios i su enemigu. Mi ta sugeri bo pues sigui e bèrdat pasombra esaki un dia lo hasi bo liber.

Skirbi dor di Maronne Drommond