Alma di Kristu kantá i ilustrá

Forsa di konvikshon

Tin hende ta mustra hopi konvinsiente ora nan ta trese nan ponensia nan dilanti otro nan di un manera no ta logra konvensé ku nan mensahe. Pa logra konvensé un hende na momento di trese un ponensia dilanti e eskoho di palabra, e ekspreshon di kara e lenguahe korporal tur ta hunga un ròl. Un aktor eksperensha por logra konvensé hende di vários kos ku no ta bèrdat. Awor kon esaki ta serka Dios?

Lo tabata inhustu si drentamentu di shelu lo tabata dependé di talento nan di aktuashon. Alfin al kabo ta e amor ta e lokual ta e kos di mas importante. Kòrdá Hesus su kontesta na e eksperto di lei: amor pa hende i pa Dios ta e mandamentu di mas importante (lesa Mateo 28:20). Den e parábola di e rei ku a yamá su kriánan pa hasi kuenta (lesa Mateo 18: 21- 35) ta keda ilustrá ku Dios ta dispuesto pa lubidá pasado malu (pekaminoso) ku nos tin. Pa esaki no mester paga un “preis”. E promé ta ku nos mester ta sinsero dilanti di Dios. E di dos ta ku nos, na nos turno tambe mester ta dispuesto di ke lubidá pasado malu di nos ruman ku a peka kontra nos. E enfoke di e artíkulo aki ta mas riba e promé. Pa nos konvensé hende nos mester tin talento di aktuashon. Pa nos konvensé Dios nos mester bin ku un kurason sinsero. Awor komprondé mi bon mi no ke kita nada for di e grasia di Dios. Kompará ku e grasia ku nos ta haña e “preis” ku nos tin di paga ei ta nèt, nèt nada. P’esei mes Hesus a atvertí ku riba dia di huisio no ta tur hende ku bisa Señor, Señor lo drenta reino di shelu (lesa Mateo 7: 21-23). Al fin al kabo e ora ei no ta bo talento nan di aktuashon ta hunga un ròl si no mas bien bo sinseridat ku bo bida ta karakterisá kuné. Nos komo hende ku no por mira kurason ta aktua basá riba loke ta den nos bista, òf basá riba di loke nos ta sinti. Pero Dios ku si ta mira nos kurason realmente por tin miserikòrdia ku nos pober pekador.

P’esei laga nos evaluá nos motivashonnan i laga loke ku nos ta hasi realmente ta sali for di un kurason puru i sinsero. Pasobra ki bal nos logra konvensé tur hende na mundu di nos bondat anto resultá ku nos no ta sinsero ku nos mes i ku Dios? E kontesta: nèt, nèt nada.

Kua Wolf bo ta Duna di Kome?

Amor, Amor i mas amor. Tur dia ora nos sende nos radio, televishon of lesa kòrant nos ta tende e notisianan negativo ku ta mustra komo sifuera nos mundu ta un mundu friu. Un mundu sin AMOR. Anto mi ta puntra mi mes, dikon? Dikon hende ta trata otro malu asina? Unda e respet pa otro ta?

Ami ta hopi floho di kere ku nos bon Dios ke nos malu. Dios ku ta stima nos asina tantu no ta permiti pa nos pasa den situashonnan ferfelu. E ta mas bien un desishon den man di hende. Dios a duna e nos e liberdat di skohe loke nos ke. Esaki ta pasó Dios ta stima nos anto e ke pa nos bai serka DjE pa nos propio boluntat.

Esaki ta laga mi korda riba e siguiente historia;

Un tata tabata siña su yu tokante di bida.
Ela bisa e yu: " Den mi tin un pelea ta tumando luga .... E ta un pelea teribel entre dos wolf.
Un wòlf ta representa angustia, envidia, dolo, tristesa, arogansia i mentiranan.
E otro wòlf ta respresenta alegria, pas, amistad, fe, bèrdat i humildad.
E mesun pelea ki ta tuma luga den di bo tambe. E ta tuma luga den kada hende su kurason."
E yu a keda pensa un ratu. Despues ela puntra e tata: "Kua wòlf ta gana?"
E tata ta responde bisando: " Eusn ku abo duna di kome"
Beibel ta bisa ku Dios ta amor (1 Huan 4:8). Pues si bo ke eksperensha e amor berdadero nos mester duna e wolf amor komo kuminda.

Reseta pa un bida felis

Despues di basta tempu off, mi tei bek online. Mi ta pidi diskulpa ku mi no a a skirbi pa basta tempu. Pero awoki mi ta pone mi mes pone un teksto di motivashon tur dia.

Awe mi ta ke skirbi un reseta pa un bida felis ku mi a lesa i ku mi ta ke komparti.

E reseta aki ta papia di meskla siboyo, tera, awa i chukulati. Nos tur sa ku tur esaki huntu lo forma un desaster. En kambio meskla awa, hariña, webu i manteka i nos tur sa ku lo forma un bolo dushi.

Kiko nos por siña di e reseta aki? Wel, si nos pasa nos bida yenando nos kabes ku kosnan inesesario manera rabia, resentimentu, jaloezie, negativismo i mesklanan i lo bira un desaster. Pero si nos yena nos kabes ku kosnan positivo, orashon i bon konseho e resultado lo ta ekselente. Nos bida lo ta paresido na e bolo dushi.

Pues mi ke invita bo pa pensa positivo, hasi orashon na Señor, nos bon Dios i keda smile semper bai. Tur kos den bida lo ta hopi mas fasil pa solushona.