Bon Siman!

Mi a peka, Señor, pordona mi.

Pasobra mi sa ku mi a faya,
mi piká ta semper mi dilanti
Kontra Bo, Bo so mi a peka,
loke ta malu den bo bista mi a hasi

Pesei bo sentensia ta hustu
i ireprochabel ta bo huisio

Salba mi! Debolbé mi mi alegria,
laga un spiritu generoso ta mi forsa.
Lo mi mustra malechornan bo kaminda
i pekadornan lo bolbe serka Bo

Manchá di sanger mi ta- Dios libra mi,
(o Dios, Abo, mi Salbador)
anto mi lenga lo gaba bo hustisia
Señor, habri mi lepnan
i mi boka lo kanta bo alabansa

Salmo 51: 3-4,12-15

Stima Señor

“ma Mi sa ki tipo di hende boso ta; den boso kurason no tin amor pa Dios.” Huan 5, 42
Esta un bèrdat grandi Hesus a papia akinan! Si nos wak róndó di nos, nos ta mira esaki. Tin odio, jaloezie, envidia, redu, inmoralidat, matamentu, hòrtamentu, falta di respet, orguyo.. i asina por sigi menshona. Esaki ta e signonan di nos amor pa Dios. I esaki Dios no ke.
Pero kon nos amor mester ta pa Dios? Dios ke pa nos sigi su mandamentunan. Anto esun di mas importante ta “Stima Señor, bo Dios, di henter bo kurason, ku henter bo alma, ku henter bo mente, i ku tur bo forsa” Marko 12;30
Pues pa nos stima Dios, nos mester laga nos boluntat keda someti bou di e boluntat di Dios. Nos ta stima Dios dor di kumpli ku Su boluntat. Ku otro palabra nos ta stima Dios realmente dor di kumpli ku sumandamentunan. “Si boso stima Mi, boso lo warda mi mandamentunan” Huan14;15
Pues ban mustra nos amor pa Dios, dor di kumpli ku su boluntat. Esta dor di kumpli ku su mandamentunan i nada mas.

Orashon
Oh, Señor, mi ta stima Bo i mi ta alaba Bo. I pa mi stima bo, mi ke kumpli ku bo boluntat. Por fabor siña mi tur dia di nobo di kumpli ku bo boluntat i nada mas. Tur esaki mi ta pidi den nòmber di Kristu Hesus. Amèn

Kuminsa e kaminata

Hesus ta invita nos pa nos sigi E. Pero hopi biaha nos no ke asepta e invitashon aki. Esaki portá dor ku nos no ta sinti nos mes emoshonalmente òf spiritualmente prepará. E ora ei ki ora ta e momentu presis pa nos sigi Hesus?
Den evangelio nos ta lesa e loke a sosode ku e 10 leprosonan(Lukas 17,11-19). 10 leproso a bin kontra Hesus i pa nan ta saná, Hesus a manda nan serka e saserdotenan i ke de paso ta basta leu pa yega serka nan. Beibel ta sigi konta ku na kaminda nan a kura. Mi no ta kere ku nan a kura denter di 10 pa 15 meter pero hopi mas despues.
Si realmente nos ke pa Dios kura nos òf si nos ta buska un milager, nos tin ku kuminsa kana AUN KU NOS LEPRA. Nos no por warda pa nos ta kurá si nos no inisia e proseso di kombershon
Pues, si bo ta sintibo kansa, den problema, dolo, angustia òf sin speransa ta net e momentu ei bo tin ku hisa bo krus i kana riba e kaminda di fe. E reino di shelu ta pa esnan balente i nos mester mas ku balentia pa nos entrega nos mes na Dios promé ku mira un milager.
Pero esaki ta un yamada pa nos kuminsa kana promé ku nos mira e kosnan sosode. Kana ku bo defektonan sabiendo ku na kaminda lo bo ta kurá. Pero AWE bo tin kuminsa ku e kaminata kargando bo enfermerdatnan i defektonan.

Orashon
Señor Hesus, mi ta asepta bo invitashon pa sigi bo. Mi sa ku mi tin mi defektonan i mi enfermedatnan pero mi tin fe ku Abo lo kurami. Sea mi guia den e kaminata di fe aki. Danki, Señor. Amèn