Catholics Come Home "Epic" ( :120)

Kua wolf bo ta duna di kome?

Amor, Amor i mas amor. Tur dia ora nos sende nos radio, televishon of lesa kòrant nos ta tende e notisianan negativo ku ta mustra komo sifuera nos mundu ta un mundu friu. Un mundu sin AMOR. Anto mi ta puntra mi mes, dikon? Dikon hende ta trata otro malu asina? Unda e respet pa otro ta?

Ami ta hopi floho di kere ku nos bon Dios ke nos malu. Dios ku ta stima nos asina tantu no ta permiti pa nos pasa den situashonnan ferfelu. E ta mas bien un desishon den man di hende. Dios a duna e nos e liberdat di skohe loke nos ke. Esaki ta pasó Dios ta stima nos anto e ke pa nos bai serka DjE pa nos propio boluntat.

Esaki ta laga mi korda riba e siguiente historia;

Un tata tabata siña su yu tokante di bida.
Ela bisa e yu: " Den mi tin un pelea ta tumando luga .... E ta un pelea teribel entre dos wolf.
Un wòlf ta representa angustia, envidia, dolo, tristesa, arogansia i mentiranan.
E otro wòlf ta respresenta alegria, pas, amistad, fe, bèrdat i humildad.
E mesun pelea ki ta tuma luga den di bo tambe. E ta tuma luga den kada hende su kurason."
E yu a keda pensa un ratu. Despues ela puntra e tata: "Kua wòlf ta gana?"
E tata ta responde bisando: " Eusn ku abo duna di kome"

Beibel ta bisa ku Dios ta amor (1 Huan 4:8). Pues si bo ke eksperensha e amor berdadero nos mester duna e wolf amor komo kuminda.

Un pensamentu

Tin un leyenda ku ta konta ku den un Reino lehano, tabata tin un prinsipe ku ta bai ser korona. Pero di akuerdo ku lei, e mester ta kasá promé. Sabiendo esaki, ela disidi di hasi un kompetensha entre e mucha muhénan di su korte pa wak ken ta digno di ta su kasa. Na e dia siguiente e prinsipe a anunsia ku elo hasi un selebrashon i anunsia un desafio.

Un ansiana ku tabata traha den e palasio pa hopi aña a skucha e komentarionan tokante di e fiesta. Ela sinti un tristesa pasó e ta sa ku su yu muhé tabata tin un sentimentu profundo di amor pa e prinsipe, pero e tabata pensa ku e no tabata na por kue desafio. Ora ela yega kas, ela kont’e e loke ta bai tin i ela keda asombra pa sa ku su yu muhé ta bai e selebrashon.

Sin por kere, ela puntr’e: “Mi yu, kiko bo ta bai hasi einan? Tur e mucha muhénan mas riku i nechi lo ta presente. Saka e idea ei for di bo kabes! Mi sa ku bo ta sufriendo, pero no laga e sufrimentu aki bira un lokura”

I e yu muhé a responde bisando “Nó. Mi no ta sufriendo i tampoko mi no ta loko. Tur kos ta indika ku hama lo mi ta skohí, pero esaki ta mi oportunidat di ta por lo menos serka di mi prinsipe stimá pa algun momentu. Esaki lo hasi mi felis”
E hoben a yega palasio pa e fiesta. Einan tabata tin e mucha muhénan mas nèchi, ku pañanan spektakular i hoyanan lombrante. E ora ei, finalmente e prinsipe a anunsia e desafio: “Mi ta bai duna boso kada unu, un simiya. Esun ku trese e flor di mas bunita denter di 6 luna, lo ta mi esposa i futuro Reina.”

E propuesta di e Prinsipe tabata sigi e tradishon di e pueblo aya ku ta balora hopi e speshalidat di kultiva algu ademas di e kustumber, amistat, relashon, etc.

Tempu a pasa i e hoben aki no tin e habilidat den e arte di hardineria pero e tabata kuidele ku hopi pasenshi i ternura. E tabata sa ku si e beyesa di e flor ta surgi manera su amor, e no ta tin di preokupa ku e resultado.
A pasa tres luna i nada no a pasa. E hoben a purba tur metodo ku e tabata konose pero nada no tabata nase. Dia tras dia e tabata mira su soño ta bira mas skur, pero su amor tabata mas profundo. Por fin, seis luna a pasa i nada no a sali

Konsiente di su esfuerso i dedikashon, e mucha muhé a bisa su mama ku e ta bai bek e palasio sin importa e sirkunstanshanan solamente pa e ta serka di e prinsipe pa un momento. Ela bai bèk palasio ku e vas bashí. Tur e pretendientenan tabata tin un flor, kada unu mas nèchi ku e otro, den diferente forma, tamaño i koló. E tabata admira. Nunka ela mira algu asina espektakular.

Finalmente, e prinsipe a yega i ela observa kada un di e pretendientenan ku hopi kuidou i atenshon. Despues di pasa dor di tur, ela anunsia su resultado. “Esun hoben nèchi ku e vas bashí lo ta mi futuro esposa.” E prinsipe a bisa
Tur e presentenan a keda babuka. Niun hende no por a kompronde kon e por skohe nèt e persona ku no a kultiva nada. E ora ei, e prinsipe a splika ku trankilidat: “Esaki ta e uniko ku a kultiva e flor ku a lag’e di bira digno di bira mi Reina i mi esposa, esta, E flor di honestidat. Tur e simiyanan ku ma duna boso tabata esteril.”

Invitashon

Eskoho

Den bida bo tin ku tuma eskoho, sea e ta bon òf malu. Nos bida ta un bida di desishon. Nos ta manera e karne òf e yu perdí ku no ta skucha e bos di su Tata Selestial. Pero ora bo skohe pa Señor bo bida ku bo tabata biba antes tin di keda atras.
Bo tin ku kambia i sea e refleho di Kristu. Hasi lo maksimo di imita Kristu . Manera San Pablo ku a kambia su bida i bira e bon mensahero, e proklamadó di bon notisia.
Hesus ta E kaminda, bèrdat i bida, niun hende no por jega serka Tata si no pa medio di Mi (Huan 14:6) .
Hesus ta pará na porta i e ta bati. Ta keda na abo si bo ke habri p’E .
Pesei mi ke enkurasha boso rumanan si ba bin aki nan no bai bashi. Ta tempu pa nos buska ankra den Kristu. Ta tempu pa hobennan hinka rudia i alaba i sigi alaba Señor. Ta E so por juda nos. Amen

Skirbí dor di Dudley Legito