Señor ta bon bin purba i mira.

Señor ki grandi Bo sabidoria ta. Bo krea mundu i tur kos ku tin den dje. Bo a plania delaster un detaye pa asina hende por tin un bida felis. Señor Bo a bendishoná mi ku un famia pa mi siña e balornan di bida. Bo a bendishoná mi ku maestro nan ku ta entrega hopi di nan tempu pa logra siña mi lo nesesario pa un mihó futuro. Bo a bendishoná mi ku un pastor ku ta guia mi spiritualmente pa kada dia konosé bo bondat mas. Señor mi sa ku bo no ta nenga bo yu nan loke ta bon pa nan. P’esei Señor mi ta pidi bo yena mi ku bo sabidoria pa mi por pasa mi estudionan ku éksito. Laga bo Spiritu Santu yena mi ku Bo donnan pa mi por tin un bon balanse entre mi bida intelektual i mi bida spiritual. Señor mi ta pidi bo esaki pa ku konvikshon mi por bisa tur kaminda ku Abo Señor ta bon. I asina mi por invitá otro nan pa nan tambe bin purba i mira bo bondat i amor. Amèn