Venera e Krus di Kristu

Hopi biaha nos ta haña e pregunta aki di diferente persona: Dikon nos ta venera Hesus riba krus siendo ku Ela resusita?

E krus ta un parti inseparabel di e mistero paskual ku ta inklui pashon, morto i resurekshon di nos Salbador.

Nos, ku ta katoliko, ta siña ku Kristu a muri pa nos pikanan i ku ela resusita despues di 3 dia. E Krus di ningun manera ta ninga e resurekshon pero den e krus ta manifesta kon serio nos pikanan ta i kon ku un amor infinito Kristu a muri pa nos pikanan.

Hesus ta siña nos: Ora boso alsa Yu di Hende, boso lo sa ku AMI TA Huan 8:28

E krus ta wordu menshona 29 bes den Testament Nobo. Hopi biaha e no ta wordu referi ku e palabra eksakto. No ta e pida palu den sentido material ku nos ta pone nos kurason n’e pero den Hesus ku a muri pa nos riba e krus ei. E ta esun ku ta hala nos. Hesus a bisa nos: Ora ku alsa mi riba tera, lo Mi hala tur hende serka Mi.Huan 12,32

E siñansa aki ta balido pa nos pa tur tempu. Kontempla Hesus “lantá” riba e Krus ta e yabi pa sera konosi kunE intimamente.

San Pedro i San Pablo ta proklama e krus.

San Pedro ku San Pablo no ta sa ku Kristu a resusita? Klaro ku si, pero nan tabata kompronde kon importante ta pa tin E semper presente pasó e krus ta e poder di Dios kontra tur forsa maligno: e forsa di nos karni, pues ku otro palabra di nos ègo. E karni ta bai segun su plaser, su konviniensha, su engrandisimentu; e krus ta laga tur esaki muri pa asina e amor di Dios reina.

P’esei henter pueblo mester tin sigur, ku e mesun Hesus ku boso a krusifika, Dios a hasi tantu Señor komo Mesias. Hechonana 2,36

Pasobra ami, ku tabata bou di Lei, a muri pa ku Lei pa asina mi biba pa Dios. Mi a keda krusifika huntu ku Kristu. Galatanan 2,19

Esnan ku ta pertenese na Kristu-Hesus, ya a krusifika e hende pekador den nan mes, huntu ku su pashonnan i mal deseonan. Galatanan 5,24

Ami si no ke broma ku nada otro ku no ta krus di nos Señor Hesu-Kristu. Pasobra pa motibu di loke El a hasi na krus, mundu a muri i ami ta morto pa ku mundu. Galatanan 6,14

Ke men a parti Kristu na pida pida anto? Ta Pablo a muri pa boso na krus? 1 Korintionan 1,13

Kristianonan semper ta tin e krus komo signo di e amor i e poder di Kristu. Tin hopi evidensha ku for di e promé siglonan tabata lanta krus komo signo di nos fe den Kristu.

Pa esnan ku ta ataka nos pasó nos tin nos krus kologa na nos garganta of pasó nos tin e kologa na nos muraya di kas, nos tin ku kontesta mane San Pablo lo a kontesta;

Pasobra e mensahe tokante Kristu su morto na krus ta kos di loko pa esnan ku ta bai pèrdi, ma pa nos ku ta keda salba, e ta poder di Dios. 1 Korintionan 1,18

Ma nos ta predika e Mesias kurisfiká. Pa hudiunan esei ta un mensahe ofensivo, pa esnan no hudiu e ta kos di loko. Ma pa esnan ku Dios a yama, sea hudiu of no hudiu, e Mesias ei ta e poder i e sabiduria di Dios. 1 Korintionan 1,23-24

Hesus a manda nos brasa nos krus tambe
Si un hende ke sigui Mi, e mester lubida su mes, hisa su krus i sigui Mi. Mateo 16,24

Kontempla Hesus na krus ta kura nos spiritualmente, manera e ladron ku tabata banda di Hesus a wordu kura ora Ela bis’e: Mi ta sigura bo: Awe mes lo bo ta huntu ku Mi den paraiso! Lukas 23:43.
Tambe Ela kura e kapitan romano ku tabata na pia di krus di Hesus, ela konberti bisando: En berdat e homber aki ta e Yu di Dios.(Marko 15:39)

Kontempla e krus ta un akto di fe. E ta inspira nos di tin e mesun aktitud ku Hesus. Ela humiya su mes i a keda obedesidu ta ora ela muri, hasta e morto na krus- Filipensenan 2:5,8

E revelashon di e amor perfekto di Hesus ta su krus mientras ku e resurekshon ta su viktoria. E krus a kòsta Heus inmneso sufrimentu ku ela akspeta sin ningun kondishon pa nos. Su resurekshon ta manifesta su poder riba morto, su viktoria glorioso.

Kristu a transforma e sentido di e krus. Antes tabata un berguensa grandi, pero awor e ta e gloria i e viktoria maksimo. Amor na e krus ta duna nos e grasia di keda fiel na nos krus uní ku esun di Kristu.

Ta pesei mi ke enkurasha bo mi rumannan, di no tene miedu di brasa e krus di Hesus. Pasobra pa medio di e morto di Hesus riba krus tur nos pikanan a wordu libra. Nos ta salba!! Ki otro muestra di amor di Dios tin ku no ta esaki? Pasobra Dios ta stima mundu asina tantu ku El a duna su uniko Yu, pa tur esnan ku pone konfiansa den djE no bai perdi, ma haña bida eterno. (Huan 3, 16)

Nos ta adoraBo Kristu i nos ta bendishona Bo, pasó Bo a salba pa munda pa bo santa krus!-Amen