Duna Tempu Tempu

Bo a yega di sintibo desesperá pasombra ta parse ku bo orashonnan no ta haña kontesta? Bo a yega di puntra bo mes dikon ta parse ku abo no por disfrutá di sierto kosnan ku na bo pareser bo tin hopi mester di nan? O akaso bo a kuminsá pensa ku bo no ta stima pa Dios mas pasombra despues di tantu aña di roga na tur manera pa bo haña un fabor serka dje ta parse ku e petishon no ta ni sikiera yega? Awèl bo tin ku lesa esaki.

Hende por lo general inkluyendo mi mes ke tur kos pasa no un bes sino for di ayera. Hopi nos ta buska kaminda nan mas fásil, mas lihé pa yega nos metanan. E bèrdat ta ku no ta tur kos por bai “via rápido”. Tin kos mester tuma su tempu pa e por desaroyá. Na momentu ku pa un o otro motibu tòg aselerá e proseso ku aki, ku mester tuma mas tempu pa desaroyá efektivamente bo ta haña bo ku otro defisiensianan. Tin un dicho ta bisa sòpi pura ta sali salu. P’esei por ehèmpel bo ta haña ku un tener no por kuida su mes yu bon pasombra e no a haña tur e eksperensianan nesesario. Nos mester siña na spera riba e ora ku Dios a stipulá pa nos. (Salmo 131) Awor no komprondé mi malu si. Mi no a manda bo bai sinta warda sin hasi nada. E kontrali ta bèrdat.

Si bo ta spera di kosecha den futuro bo mester sembra tur dia, kòrda ku no ta tur simia ta kai den bon tera. Si bo ke brasa di sierto hende por ta bo mester kita for di otro. Si bo ke ta mas stima por ta ora pa abo duna mas stimashon i odia algun kos malu di bo mes. No pèrd’é speransa te ora Dios duna bo e palabra. Sigui prepará bo mes ku mira riba un mihó futuro pa ora bo tempu yega bo ta bon prepará pa esaki. Mi ta terminá ku un reflekshon.

Tur kos tin su ora i su tempu tur kos aki na mundu:
ora pa nase i ora pa muri,
ora planta i ora pa koba saka fo’i tera,
ora pa mata hende i ora pa konstruí,
ora pa yora i ora pa hari,
ora pa tene luto i ora pa baila,
ora pa plama i ora pa pone huntu,
ora pa brasa i ora pa kita fo’i otro,
ora pa buska i ora pa resigná,
ora pa warda kos i ora pa tira kos afó,
ora pa sker kibra i ora pa drecha,
ora pa keda ketu i ora pa papia,
ora pa stima i ora pa odia,
ora pa guera i ora pa pas. (Eklesiastes / Predikador 3:1-8)

Warda bo tempu ku poder di Dios bo tempu lo yega.