Alabansa komo muestra di amor

Amor, Amor i hopi mas amor. Mayoria di nos sa ku amor ta hopi importante den nos bida. Mas ku hopi importante beibel ta siña nos ku AMOR ta e kos di mas importante den nos bida.

Palabra di Dios ta siña nos ku e la stima nos asina tantu ku e la ofresé su úniko Yu nos Señor Hesus Kristu pa esun ku kere den dje no bai pèrdí ma haña bida eterno (Huan 3:16). Awor pa un amor ta perfekto lo bon pa esaki bini di dos banda. Den e kaso aki Dios a demostrá nos ku E ta stima nos awor a keda pa nos na demostrá na Dios bek ku nos tambe ta stim’É pa asina e amor ta bini di dos banda. Amor mester keda demostrá ku palabra i echo. Alabansa ta yuda nos ta den kontakto direkto ku nos Kreador. Sali for di un amor profundo pa nos Dios pa tur lokual ku e la duna nos ta alabá Señor i dun’E tur honor i gloria. Hesus su kontesta tabata basta kla na e dòkter di lei enkuanto kua ta e mandamentu di mas importante. Hesus a respondé: “Stima Señor nos Dios ku henter bo kurason i stima bo próhimo manera bo mes.” Pues riba tur kos amor pa bo próhimo i pa Dios ta e kos di mas importante. Ta sali for di e amor profundo aki ku bo por hasi alabansa na Dios (Marko 12:28-34).

Tin un kos hopi interesante ku ta pasa durante di alabansa. Ta normal pensa ku si alabansa ta un akto di nos amor pa Dios ku esun ku ta benefisiá mas tantu di e alabansa ta Dios na kual e alabansa ta dirigí. Awèl vários biaha mi a yega di drenta alabansa kansa, fada òf desanimá. Despues di alabansa mi a sali yen di energia kla pa bai kualke guera. Den vários salmo tambe esaki ta keda ilustrá. Un ehèmpel di esaki ta Salmo 103 kaminda e eskritor ta ordená su alma pa alabá su Kreador pa tur lokual ku e la risibí den pasado i pa tur lokual lo e bai risibí den futuro.

Pues si bo ke duna muestra di bo amor pa Dios no pèrdè niun oportunidat pa dun’é bo alabansa, pasombra kòrda ku esaki ta un muestra di bo amor pa Dios.