Preis di siña

Kada persona ta siña na diferente manera. Pa ilustrá esaki nos por hasi e siguiente komparashon.
Tin mucha ta komprondé ku bo no mester pasa òf yega serka di rant di stupi pa nan no kai, despues di un òf mas biaha ku bis’é esaki.
Otro mucha ta komprondé esaki te ora nan kai (sinti doló) un biaha òf mas biaha.
Otro mucha no ta komprondé esaki nunka pa falta di komprendimentu.

Doló hopi biaha ta wòrdu asosiá ku kos nan malu so. Esaki ta wòrdu asosiá ku kastigu. Pero aparte di e sensashon malu, e sensashon amargo ku esaki por tin na momentu ku e pasa nos mester realisá nos mes ku tin ora esaki ta un preis ku nos tin ku paga pa nos siña un lès. Bien por ta posibel ku nos a haña instrukshon ku nos a neglishá, òf nos no a komprondé. Por ta pa via di e medio aki nos lo realisá ku tin algu nos mester drecha den nos bida.

Un kos ta sigur na momentu ku bo ta sinti doló keda kontentu pensando ku bo ta haña un lès pa bira un mihó hende. Reflekshoná riba esaki. Felis e hende, Señor, ku Bo ta skual, ku Bo ta instruí den bo lei (Salmo 94:12). Ora bo para ketu na esaki e úniko pregunta ku ta keda ta: Bo ta dispuesto pa paga e preis pa siña?