Sakrifisio envano?

Tur bo sakrifisionan ta parse enbano? Bo a ofresé un fortuna a kambio di bo salbashon?
Kon bo por ta sigur ku tur bo sakrifisionan tin balor? Aparte di esei kon bo por sa si ta bale la pena hasi sakrifisio? Lo mi purba ilustrá esaki pa medio di artíkulo aki.
Tin hende ta hasi sakrifisio motivá pa haña un bon chèns na momentu di wòrdu husga òf simplemente pa obligashon. Esaki no por ta un motivashon, sigur si den bo sakrifisio bo ta trapa tur hende i tur kos den bo kaminda. Tur bo sakrifisionan e ora ei ta enbano, pasombra bo no a tene miserikòrdia ku bo ruman. Pakiko Dios si lo mester tin miserikòrdia ku bo? Miserikòrdia esei Dios ta deseá mas ku sakrifisio. (Mateo 9: 9-13)
E kos di mas grandi ta di tin miserikòrdia ku bo ruman. Semper ora nos ke wak kiko ta esun mihó nos ta buska un modelo awèl e modelo ideal den esaki ta Hesus. E kos di mas grandi ku e la hasi ta di tin miserikòrdia pa ku su próhimo p’esei e la kura vários hende ku tabata malu i no a husga Maria Magdalena. Si Hesus mes ku ta perfekto no a husga ken nos ta pa husga? Laga e trabou di hues pa Hues. Miserikòrdia ta un akto ku ta Sali for di amor p’esei dia un dòkter di lei a puntra Hesus kua ta e mandamentu di mas importante. Hesus su kontesta tabata basta kla: “Stima Señor nos Dios ku henter bo kurason i stima bo próhimo manera bo mes.” Pues riba tur kos stimashon pa bo próhimo i pa Dios ta e kos di mas importante. Ta sali for di e stimashon aki ku bo por tene miserikòrdia for di kual lo bo por hasi sakrifisio pa yuda bo próhimo (lesa Marko 12:28-34) òf pa alabansa na Dios. Un bon ilustrashon di un sakrifisio ku balor ta e sakrifisio ku Dios y Hesus a hasi pa nos.
Dios a stima nos asina tantu ku e la hasi un sakrifisio èkstra ordinario pa nos por haña salbashon. E la hasi e sakrifisio pasombra e tabata stima nos i e ta ke pa nos sa kuantu e tabata, ta i lo sigui stima nos. Esaki ta un ehèmpel di un sakrifisio di kurason! Un sakrifisio ku ta agradá Dios pues mester ta sali for di kurason, for di amor pa bo próhimo y òf amor pa Dios.
Pues si bo ke pa bo sakrifisio tin balor sòru ku e ta bini for di fondo di bo kurason komo un akto di amor i miserikòrdia. E pregunta ta surgi e ora ei esaki ta garantia di salbashon? Gustosamente lo mi ke tende reakshon anto nos lo publiká un artíkulo riba esaki despues.